თვალისმომჭრელი სილამაზე, ბრწყინვალება, მარჯანი, მარგალიტი, სვაროვსკის კრისტალი, ფერადი ბისერები... რთულ და დახვეწილ ორნამენტებად გადახლართული, მხოლოდ მისი ხელისთვის დამახასიათებელი ოსტატობით და ორიგინალურობით... ფოტოზე ასეთია დიზაინერ თამუნა ლეჟავას ნამუშევრები, თუმცა თითოეული მათგანისთვის ხელის შეხება დაგარწმუნებს, რომ ისინი ბევრად უფრო მეტია . ისევე, როგორც მათი შემქმნელის სამყარო...
ყველაფრის სათავე კი, რაც არ უნდა უცნაური და სასაცილო იყოს, უჭმელი ბავშვი იყო... ანუ თავად ამ სამკაულების ავტორი ბავშვობაში, რომელსაც ბებია თითო პარკი ბისერის ყიდვას ჰპირდებოდა, თუ იმ დღეს საჭმელს შეჭამდა. ამგვარად, ბავშვს კვირაში მთელი ყუთი ფერადი ბისერები უგროვდებოდა და ბებიის მიბაძვით (რომელიც თავად აკეთებდა ბისერებისგან ქისებს) პირველ ნამუშევრებს აკეთებდა. ხოლო წლების შემდეგ, როცა საბჭოთა კავშირი დაიშალა და ქართველებს დანგრეული და გაუგებარი ქვეყანა შეგვრჩა ხელში, ქრონიკული დეპრესიის ფონზე აითვისა მძივები...გართობის დონეზე, სანამ სერიოზულ ოსტატად ჩამოყალიბდებოდა.
პირველი სერიოზული ნამუშევარი იმდენად ს ე რ ი ო ზ უ ლ ი აღმოჩნდა, როგორსაც თავადაც არ ელოდა. პირველი პერსონალური გამოფენისთვის (რომელიც 2007წელს გაიმართა) ეს სამკაული განათავსა ფლაერებზე. მოგვიანებით კი, 2012წელს, ერთმა თურქმა დიზაინერმა ქალბატონმა “დააკოპირა” მისი ასლი და ამ პლაგიატით სტამბულის პრესტიჟული შოუ-კონკურსი- Bijoux Expo მოიგო. თამუნამ სრულიად შემთხვევით, ფეისბუქზე განთავსებული დაჯილდოების ფოტოთი და გამარჯვებული დიზაინერის ინტერვიუთი შეიტყო ამის შესახებ. მაშინვე დაწერა წერილი და გაუგზავნა კონკურსის ორგანიზატორებს და თურქეთის კულტურის სამინისტროს. დიზაინერი გააოცა თურქების პრინციპულობამ, როცა ბოდიშის შემცველი პასუხი მეორე დღესვე მიიღო და სტამბულის კონკურსის შედეგებიც გაუქმდა. ასეთი დიდი და ხმაურიანი ისტორია ჰქონდა მის პირველ სამკაულს.
2007, 2009, 2010 წლებში პერსონალური გამოფენები.. გალერეა " ბაიაში" შარდენის ქუჩაზე; 2009-ში მოსკოვის "ბისერ-ფესტი"; 2011-ში ANOUKI BICHOLLA-ს შემოდგომა/ზამთრის კოლექციის სამკაულებით გაფორმება; თბილისის მოდის კვირეულები (2011-12წ); ტალინის მოდის კვირეული (2012წ); ასევე 2012 წელს უკრაინულმა ჟურნალმა-“fashion” მისი ერთ-ერთი ნამუშევარი ყდაზე განათავსა; ასევე 2012 წელს შეერთებულ შტსტებში გამოცემულ კატალოგში SHOWCASE 500 BEADED JEWELRY მისი 4 ყელსაბამი მოხვდა და ხოლო თავად დასახელდა 25 საუკეთესო დიზაინერს შორის, ხოლო ყელსაბამი "1001 NIGHTS" ავტორებმა მიიჩნიეს ერთ-ერთ საუკეთესოდ მთელ კატალოგში, რაც მითითებულია კატალოგის ანოტაციაში მის ყდაზე. 2013 წელს საერთაშორისო კონკურსზე- Bead Dreams (შეერთებული შტეტები) მისი სამკაული " Diamonds are a Girl's Best Friend" გახდა ფინალისტი 15 საუკეთესოს შორის და ასევე 2013-ში კონკურსზე B.O.T.B'13, რომელსაც ყოველწლიურად ატარებს კომპანია BEADSMITH-ი მისი ყელსაბამი “Treasure of Topkapi” 194 დიზაინერის ნამუშევრებს შორის, 12 საუკეთესოს შორის მოხვდა...... და სხვა მრავალი ღონისძიებები და წარმატებები, რომლებიც სტიმულს აძლევენ აქტიურად გააგრძელოს მუშაობა.
“ამის შექმნისთვის სულ 1 მაგიდაა საჭირო...”-, ამბობს და ყველაფერს საკუთარ ბინაში, თავისი ხელით ქმნის. მისი შთაგონების წყარო ყველაფერი შეიძლება გახდეს-ფილმის პერსონაჟიდან დაწყებული, საინტერესო მასალით დამთავრებული. იყენებს როგორც ნახევრად ძვირფას,ასევე საკმაოდ ძვირადღირებულ მასალასაც,მათ შორის 24კარატიანი ოქროთი დაფერილ ბისერებს, რომელსაც სამკაულებს დეტალებში ურთავს. ამასთანავე, სამუშაო საკმაოდ შრომატევადიდა ხანგრძლივია (ზოგჯერ რამდენიმე თვესაც მოიცავს) . შესაბამისად, მისი მყიდველები ძირითადად უფრო შეძლებული ადამიანები არიან, თუმცა დიზაინერთან მისული ნებისმიერი დამკვეთი მისთვის ერთია. ყველასთვის ერთნაირი სიამოვნებით შრომობს.
ძვირფასი, მასიური ყელსაბამების გარდა, ქმნის შედარებით სადა, ჩვეულებრივ, არასადღესასწაულო სამოსზე და თუნდაც უბრალო ჯინსებსა და პერანგებზე გასაკეთებელ ჰალსტუხებს, ქამრებს, საყურეებს...
და მაინც, მისი თვალშისაცემი სამკაულები თამამი ქალებისთვისაა განკუთვნილი :)
რას ფიქრობს იმაზე, რომ საქართველოში ყოველ ფეხის ნაბიჯზე ხელნაკეთი ნივთების დიზაინერები (და ინტერნეტშიც ანალოგიური სახელის მქონე გვერდები) გვხვდებიან? თვლის, რომ ამ ყველაფერს ცოტა ხელოვნური და გადაჭარბებული სახე აქვს. “ “Handmade”-უნდა იყოს გამორჩეული თავისი სირთულით და მასში უნდა იკითხებოდეს ავტორი. უნდა გეყოს სითამამე, შენთვის ცნობილი ტექნიკებით რომ გააკეთო ვარირება, სხვადასხვაგვარი ინტერპრეტაცია. თუ შენს მიერ შექმნილ ნივთს ნებისმიერი გააკეთებს, მაშინ მას არავითარი ინტელექტუალური ფასეულობა არ გააჩნია“.
ხშირად უკითხავთ მისთვის, მასტერკლასებს ხომ არ ატარებს, ან წიგნი ხომ არ აქვს გამოცემული. ამიტომაც, უკვე დაწყებული აქვს წიგნის დაწერა. მისი თქმით, ამ საქმიანობაში არის რაღაც ნიუანსები, რომელთაც არტისტი თუ თავის თავთან შეიმუშავებს საკუთარი გამოცდილებით, გემოვნებით და შესაძლოა ცოტათი მე6 გრძნობითაც კი, სწორედ ეს იქნება საინტერესო. მიაჩნია, რომ თუ ადამიანი გადაწყვიტავს რომ ეს საქმე მისთვის არ უნდა იყოს მხოლოდ ჰობი და იგრძნობს ამის გაკეთების სურვილს საკუთარ თავში, მას დასჭირდება რაღაც, რაც მის პოტენციალს გააღვიძებს და ხელს შეუწყობს. შესაბამისად, მშრალი და მექანიკური აღწერების მაგიერ, მის წიგნში იქნება პატარა მოთხრობები, რომლითაც მოახერხებს ამ ტექნიკის გადმოცემას, რომ წაკითხვისას ადამიანმა იგრძნოს, რაოდენ აუცილებელია თითოეულ ნივთში ხელოვნების პატარა სულის ჩადება...
და ბოლოს, როგორც აღმოჩენა- ერთი გარკვეული კუთხით ნიჭიერ ადამიანებს, არცთუ იშვიათად სხვა ნიჭიც აღმოაჩნდებათ ხოლმე, რომელიც საზოგადოებისთვის ნაკლებადაა ცნობილი. თამუნა მშვენიერი თვითნასწავლი მხატვარიცაა, რაშიც მასთან სტუმრობისას კედლებზე გამოფენილმა საინტერესო ნახატებმა დამარწმუნა.
თამუნა ლეჟავას გვერდი ფეისბუქზე
Beads By Tamuna Lezhava
P.S. მე, სამკაულების არ-მოყვარულს, ახლაც მიჭირს იმ აღფრთოვანების სიტყვებით გადმოცემა , რაც ამ მშვენიერი ნამუშევრების ცოცხლად დათვალიერებამ და საკუთარ თავზე მოსინჯვამ განმაცდევინა. ჰოდა, წარმოიდგინეთ, რა დაგემართებათ მათ, ვისაც სამკაულები, მორთვა-მოკაზმვა და თავის წარმოჩენა გიყვართ!:) იმ მომავალ მყიდველებს, ვისაც დიზაინერ თამუნა ლეჟავას ხელით შექმნილი სასწაულები გელიან...
/ნინო ჭინჭარაული/
.jpg)
