გაქცევა

ქათმისფეხებიანი ქოხი დამდევს,
წიფლის ბნელ ფუღუროში ვიმალები,
ცრუ განგაშს ატეხავენ მამლები და
ვინ როგორ გაიგებს იმ მამლების

ყივილს, შუაღმისას ხევებში რომ
დევის ხვრინვა ისმის, ქარაფიდან,
ცოცხზე შემჯდარი დედაბერი
სადღაც მოუსვლელში გადაფრინდა.

ბოროტ ზღაპრებიდან გაქცვა მსურს,
თუ კი ამას მაინც ბედი მაცლის,
დედის ნათელ ხსოვნას გააშავებს
წყევლა უანჩხლესი დედინაცვლის.

ასე ფეხმორთხმული, ფუღუროში
ვზივარ, გათენებას ველოდები,
შეჩვენებულივით ერთ ღამეში
წვერი მეზრდება და ვმელოტდები.

/სოსო მეშველიანი/